2026 ~ Surath Giri's Blog

Jun 13, 2026

असल अर्थशास्त्र : अर्थशास्त्रका सिद्धान्तहरू सरल तरिकाले बुझाउने एउटा पुस्तक [Free PDF]

June 13, 2026 Surath Giri

वर्षौंदेखि हाम्रा राजनीतिक आन्दोलनहरूले आर्थिक समृद्धिको नारा त दिए, तर उद्यमशीलता, बजार व्यवस्था र आर्थिक स्वतन्त्रता जस्ता मूल विषयहरू सधैं ओझेलमा परे । त्यसैले नेपालको सार्वजनिक बहसमा अर्थशास्त्रका आधारभूत र व्यावहारिक सिद्धान्तहरूलाई सरल भाषामा पुर्‍याउने प्रमुख उद्देश्यसहित वि.स. २०७५ मा मैले कमन सेन्स इकोनाेमिक्स: व्हाट् एभ्रिवान सुड नाे अबाउट वेल्थ एण्ड प्राेस्पेरिटी भन्ने अर्थशास्त्रकाे एउटा चर्चित पुस्तकलाई नेपालीमा अनुवाद तथा स्थानीयकरण गरेकाे थिएँ । यस पुस्तकमा कठिन शब्दावली र जटिल गणितीय सूत्रहरूलाई थाती राखेर, वास्तविक जीवनका उदाहरणहरू र आम विवेकका माध्यमबाट समाज र देश कसरी समृद्ध बन्छन् भन्ने कुरा प्रस्तुत गरिएको छ । अनुवादकका रूपमा यो मेरो पहिलाे पुस्तक थियाे र नेपाल प्राेस्पेरिटी इन्स्टिच्युटकाे पहिलाे प्रकाशन पनि । यसकाे पहिलाे अध्यायकाे चाहिँ हामीले श्रव्यपुस्तक पनि बनाएका छौँ जुन तपाईँले यहाँ पाउन सक्नुहुन्छ ।

उक्त पुस्तकको डिजिटल संस्करण यहाँ प्रस्तुत गरेको छु । आशा छ याे तपाईँहरूका लागि उपयाेगी हुनेछ । यस पुस्तकले तपाईंलाई आर्थिक दृष्टिकोणले सोच्न र हाम्रा नीतिगत समस्याहरूलाई बिल्कुलै नयाँ कोणबाट हेर्न सघाउनेछ भन्ने मलाई विश्वास छ । कृपया यो पुस्तक उपयोगी हुनसक्ने अन्य व्यक्तिहरूमाझमा पनि यसलाई बाँड्न नभुल्नुहाेला ।

Jun 9, 2026

व्यापार तथा भूमण्डलीकरणः एक परिचय

June 09, 2026 Surath Giri

डा. इमन् बट्लरद्वारा लिखित ‘एन इन्ट्रोडक्सन टु ट्रेड एण्ड ग्लोबलाइजेशन’ (An Introduction to Trade and Globalization) अन्तर्राष्ट्रिय व्यापार, खुला बजार र भूमण्डलीकरणका आधारभूत आयामहरूलाई सरल भाषामा बुझाउने एक उत्कृष्ट पुस्तक हो । यस पुस्तकमा लेखकले विगत ५० वर्षमा विश्व व्यापारमा भएको तीव्र वृद्धि, अन्तर्राष्ट्रिय राजनीति र वाणिज्यबीचको बढ्दो सम्बन्ध, तथा आधुनिक जीवनमा भूमण्डलीकरणको अपरिहार्य भूमिकाबारे गहन विश्लेषण गरेका छन् । व्यापारले कसरी दुई देश वा समाजबीच द्वन्द्व नभई आपसी समृद्धि र सकारात्मक आर्थिक परिवर्तन ल्याउँछ भन्ने कुरालाई बट्लरले यस पुस्तकमा स्पष्ट पारेका छन् । यस पुस्तकमा अर्थशास्त्रका जटिल सिद्धान्तहरूलाई सर्वसाधारणले पनि सहजै बुझ्न सक्ने गरी प्रस्तुत गरिएको छ ।

मैले सन् २०२४ मा समृद्धि फाउण्डेशनका लागि यस पुस्तकलाई नेपालीमा अनुवाद गरेकाे थिएँ । मलाई लाग्छ नेपालजस्तो विकासोन्मुख देशका लागि यो पुस्तक अहिलेको समयमा झनै बढी सान्दर्भिक छ । हामी कसरी विश्व बजारसँग जोडिएर आर्थिक लाभ लिन सक्छौँ र व्यापारलाई जति धेरै नियन्त्रण गर्‍यो, त्यति नै कसरी हाम्रै अर्थतन्त्र संकुचित हुँदै जान्छ भन्ने कुरा यसले बडो गज्जबसँग बुझाउँछ । विशेष गरी अर्थशास्त्र, व्यवस्थापन र राजनीतिशास्त्रका विद्यार्थीहरू, लोक सेवाको तयारी गरिरहनुभएका साथीहरू, र नेपालको आर्थिक नीति एवम् वैदेशिक व्यापारमा चासो राख्ने जोकोहीका लागि पनि यो पुस्तक एउटा नभई नहुने र निकै उपयोगी सन्दर्भ सामग्री बन्नेछ भन्ने कुरामा म विश्वस्त छु ।

तपाईँले यो पुस्तक यहाँ पढ्न वा डाउनलाेड गर्न सक्नुहुन्छ ।